نئی دہلی، 17/ستمبر (ایس او نیوز /ایجنسی) مودی حکومت کی تیسری مدت کے 100 دن مکمل ہو نے پر کانگریس نے ایکس پر مودی سرکار کی سخت تنقید کی۔ اس موقع پر جہاں بی جے پی کے رہنما ہمیشہ کی طرح  اپنی کامیابیوں کا ڈھنڈورا پیٹنے میں لگے ہیں، وہیں کانگریس مودی  حکومت کی ناکامیوں کو اجاگر کرنے  میں مصروف ہے۔ کانگریس کی ترجمان سپریا شرینیت نے ایک پریس کانفرنس میں مودی حکومت کی 100 دنوں کی ناکامیوں کی تفصیلات میڈیا اور عوام کے سامنے رکھنے کے ساتھ ساتھ کانگریس کے  سوشل میڈیا پلیٹ فارم 'ایکس' پر بھی اسے پوسٹ کرتے ہوئے عوام  کو بیدار کرنے کی کوشش کی ہے۔  

کانگریس نے گرافکس اور ویڈیو پر مشتمل کئی ایسے پوسٹ کیے ہیں جن میں مرکزی حکومت کو مختلف سطحوں پر ناکام ظاہر کیا گیا ہے۔ مثلاً ایک تصویری پوسٹ میں مودی حکومت سے سوال کیا گیا ہے کہ مودی حکومت نے  ’100 دن میں کیا  کام کیا؟‘ پھر اس کے نیچے بڑے حروف میں لکھا گیا ہے ’میں نے پی آر کیا‘۔ یعنی کانگریس نے مودی حکومت پر 100 دنوں کے دوران محض پی آر یعنی اپنی تشہیر کرنے کا الزام عائد کیا ہے۔

ایک ویڈیو پوسٹ میں کانگریس نے 100 دنوں کی ناکامی کا تذکرہ کرتے ہوئے بتایا گیا ہے کہ ’’نریندر مودی کو وزیر اعظم بنے ہوئے 100 دن ہو گئے ہیں۔ ان 100 دنوں میں ان کی حصولیابیوں کی بات کریں تو ملک میں 38 ریل حادثات ہوئے ہیں جن میں 21 لوگوں کی موت ہوئی اور 112 افراد زخمی ہوئے۔ لیکن نریندر مودی خاموش ہیں اور وزیر ریل ان حادثوں کو چھوٹے چھوٹے واقعات بتاتے ہیں۔ یہ ظاہر کرتا ہے کہ نریندر مودی کے پاس ریلوے کے لیے کوئی ویزن نہیں ہے۔ وہ پوری طرح فیل ثابت ہوئے ہیں۔‘‘ اس ویڈیو کے ساتھ یہ بھی لکھا گیا ہے کہ ’نریندر مودی کے 100 دنوں کا رپورٹ کارڈ: فیل‘۔

ایک دیگر ویڈیو میں کانگریس نے 100 دنوں کے اندر پیش آئے دہشت گردانہ واقعات کا تذکرہ کیا گیا ہے۔ ویڈیو میں بتایا گیا ہے کہ ’’نریندر مودی کو وزیر اعظم بنے ہوئے 100 دن ہو گئے ہیں۔ ان 100 دنوں میں ملک کو کئی دہشت گردانہ حملوں کا سامنا کرنا پڑا ہے۔ پچھلے 100 دنوں میں 26 دہشت گردانہ حملے ہوئے جن میں 21 جوان شہید ہوئے اور 29 جوان زخمی ہوئے۔ ان واقعات میں 15 شہریوں کی موت ہوئی اور 47 افراد زخمی ہوئے۔ نریندر مودی دہشت گردانہ حملوں کو روکنے میں ناکام ثابت ہوئے ہیں۔ انھیں ملک کی حفاظت کی فکر نہیں ہے۔ نریندر مودی کی پوری توجہ اپنے امیر دوستوں کو مزید امیر بنانے پر ہے۔‘‘

ایک دلچسپ تصویری پوسٹ پیپر لیک سے متعلق بھی کانگریس نے ’ایکس‘ پر کیا ہے۔ اس تصویر میں نیٹ پیپر لیک، نیٹ پی جی امتحان منسوخ، یو جی سی-نیٹ پیپر لیک، جوائنٹ سی ایس آئی آر-یو جی سی-نیٹ منسوخ، این سی ای ٹی پیپر لیک کا تذکرہ ہے۔ انگریزی میں بڑے حروف کے ساتھ ’لیکس‘ بھی لکھا گیا ہے جس کے اوپر ’کمل‘ (بی جے پی کا انتخابی نشان) کا مہر جیسا نشان ڈالا گیا ہے۔ اس تصویری پوسٹ کے ساتھ یہ کیپشن بھی لکھا گیا ہے کہ ’مودی جی پیپر لیک رکواتے کیوں نہیں؟‘ اس کے علاوہ بھی کچھ پوسٹ کیے گئے ہیں جو دلچسپ ہیں اور مودی حکومت کے 100 دنوں کو بری طرح ناکام ظاہر کر رہے ہیں۔